Претседателот на Собранието Талат Џафери денеска во свое и во име на пратениците упати честитка по повод Денот на албанското знаме – 28 Ноември, изразувајќи „искрени желби за бескрајни успеси и напредок на Албанците каде и да се, а празникот, како што е впрочем и цел месец ноември, нека биде повод за чувство на гордост и среќа за тоа што сме биле, сме и ќе бидеме во иднина“.

– Несомнено дека овој значаен празник е длабоко втиснат во колективната национална историска меморија и во срцата на сите припадници на албанскиот народ, каде и да се наоѓаат раштркани по светот и денес, кога ја одбележуваме 110-годишнината од денот кога мудриот дипломат Исмаил Ќемали, заедно со делегати од различни албански градови го истакна националното знаме во Валона, Албанците, со чувство на национална гордост го чествуваат како симбол на албанската национална културна ренесанса, пишува во честитката собранискиот претседател.

Џафери нагласува дека нашата заедничка државна и регионална определба за европска интеграција е единствениот патоказ којшто „нè мотивира да работиме посветено и неуморно за да станеме што побрзо дел од големото европско семејство“.

– Таму, заедно, со исти заеднички вредности и стандарди, ќе придонесуваме за подобар свет за идните генерации. Живееме во времиња на предизвици во секој поглед и само сплотеноста ја сочинува вистинската сила, која може да ја надмине секоја препрека. А Албанците, заедно со сите граѓани на РС Македонија, се камен на консолидирање на таа сила. Нека е честит 28 Ноември – Денот на знамето, додава Џафери во честитката.