Европската комисија соопшти дека ќе ги задржи сите 22 милијарди евра од фондовите за кохезиската политика на ЕУ за Унгарија додека нејзината Влада не ги исполни условите кои се однесуваат на владеењето на правото и почитувањето на човековите права.
Износот од 22 милијарди евра се наменети за Унгарија од „кохезиските фондови“ на ЕУ кои земјата треба да ги добие од долгорочниот буџет на ЕУ од 2021 до 2027 година.
Одлуката да се задржи целиот износ за земјата е донесена бидејќи вчера Комисијата и Будимпешта потпишаа таканаречен договор за партнерство во кој детално се наведува како ќе се трошат парите од буџетот на ЕУ, како и 11 оперативни програми во рамки на кохезиската политика.
– Ќе продолжиме да работиме со унгарските власти за надминување на оваа ситуација, рече Елиса Фереира, комесар на ЕУ за кохезија и реформи.
Унгарија и ЕУ со години се расправаат околу владеењето на правото, корупцијата, третманот на сексуалните малцинства, образованието и миграциската политика.
