Треба да отвориме преговори со тие земји веднаш откако Европскиот совет ќе донесе заклучок дека се исполнети критериумите, изјави за Шпигел, Урсула фон дер Лајен, во првото интервју откако е претседателка на Европската комисија.
Таа за европската перспектива на Македонија и Албанија рече:
-Тие се наши соседи, вели Фон дер Лајен.
Претседателката на ЕК вели дека ќе се залага за почеток на преговорите за членство во ЕУ со Македонија и Албанија, веднаш откако ќе се оцени дека овие две држави ги исполниле критериумите, пренесува „Дојче веле“.
Фон дер Лајен во вторникот беше избрана за прва жена во историјата на чело на Европската Комисија. Во текот на кампањата во која ги убедуваше европратениците во Европскиот Парламент да гласаат за неа, таа во неколку наврати во своите приоритети ги наведуваше и преговорите со двете западнобалкански држави, а во првото интервју тоа и го потврдува.
– Треба да отвориме преговори со тие земји веднаш откако Европскиот совет ќе донесе заклучок дека се исполнети критериумите. Треба да ја оставиме испружена раката кон овие земји. Го делиме истиот континент, истата историја, ние сме соседи. Доколку на овој регион му ја затвориме вратата, си предизвикуваме штета себеси, рече Фон дер Лајен во интервјуто за „Шпигел“.
Фон дер Лајен треба да ја преземе новата функција на 1 ноември годинава.
Пред десетина дена, пред претставувањето пред политичките фракции во Европскиот Парламент, Фон дер Лајен ја пофали Македонија како светол пример.
– Западниот Балкан мора да се сфати посериозно, а С. Македонија е светол пример за позитивни постигнувања, рече тогаш таа.
Урсула фон дер Лајен, во својство на министерка за одбрана на Германија, беше во посета на земјава во септември 2018 година, пред референдумот. Тогаш таа рече дека земјва има уникатна шанса што не смее да ја пропушти за влез во евроатланстското семејство и порача дека ЕУ сака да гради иднина со земјава.
