Советот на министри на Босна и Херцеговина денеска одлучи да побара помош од Хрватска за гаснење пожари што со денови горат на јужниот дел на земјата.
На итна телефонска седница, Советот на министри донесе одлука за барање меѓународна помош за заштита и спасување на предлог на Министерството за безбедност, со согласност на сите министри, се наведува во соопштението доставено до медиумите.
Од Хрватска е побарана меѓународна помош во форма на испраќање противпожарни авиони – канадери со екипаж, во координација со телата за цивилна заштита во Босна и Херцеговина.
Одлуката е донесена со цел да се помогне на населението во херцеговските општини Читлук, Чапљина, Коњиц, каде гаснењето на големите пожари е отежнато поради непристапниот терен.
