Животната средина е високо на политичката агенда на Иран, беше речено на денешната средба на министерот за животна средина и просторно планирање Насер Нуредини со амбасадорот на Иран, Хосеин Карими.
– Имено, Директоратот за животна средина е специјална владина организација водена лично од Претседателот на Иран, институција спремна да соработува на теми од заеднички интерес, се вели во соопштението од прес-службата на Министерството за животна средина и просторно планирање.
Министерот Нуредини изрази задоволство за наоѓање заеднички приоритетни теми за соработка во балансот меѓу одржливиот развој и економски бенефит.
Министерот за животна средина и просторно планирање Насер Нуредини денеска се сретна и со амбасадорот на Република Италија, Карло Ромео, на која изрази почит и благодарност за поддршката што Италија ја дава во евроинтегративните процеси на Република Северна Македонија, како и спремноста за соработка за долгорочни решенија во исполнување на ЕУ критериумите во областа на животната средина.
Како што соопшти МЖСПП, амбасадорот Ромео истакна дека Македонија е на вистинскиот пат и поддршката од страна на Република Италија е во насока на реформи во легислативата и институциите кон патот на исполнување на стандардите и вредностите на ЕУ.
-Тоа е главната цел на преговарачкиот процес и придобивките би биле за следните генерации, се наведува во соопштението.
Во таа насока, се посочува, беше актуелизирана темата за потпишување на Нацрт-Меморандум за разбирање за соработка во областа на ранливост на климатските промени, процена на ризик, адаптација и ублажување меѓу Министерство за животна средина и просторно планирање на Македонија и Министерството за животна средина, земја и море на Република Италија.
