Од Бадниковата погача тиквешани кршат и за лозјата, потсети денеска Томе Крстевски, кустос етнолог при Музеј – галерија Кавадарци.
-Со кршењето на лебот со паричката на неколку дела, како на Господ бог, на куќата, на семејството, на лозјето и на членовите на семејството, се верува во бериќет, плодност кај стоката, среќа во фамилијата, богат род во лозјето, а најмногу среќа се смета дека носи она парче во кое ќе се падне паричката, појасни тој за МИА.
Крстевски рече дека Божиќните празници и обичаи како дел од духовната култура на населението, се празници на радоста и надежта.
-„Бадникова вечер” е празник што кај православните христијани се слави во секоја куќа и домаќинство. Ден кога сите треба да се „прибериме дома”, кај и да си, дома да си на овој светол ден. Во подготовката на вечерата обредните лебови се од големо значење, бидејќи се сметало дека голтањето храна, покрај одржувањето на физичката состојба, може да постигне и метаформоза. Да се премине во сферата на сакралното, да се постигне изменета состојба на свест, болест, лекување итн, а според старите верувања, може да дојде и до оплодување, вели Крстевски.
Посната вечера, нејзиното поставување и обичаите во текот на вечерата, придонесуваат за духовно задоволство кај народот, нагласи тој.
Крстевски додаде дека секој елемент од вечерата има своја симболика. Виното, оревите, тиквата, смоквата, лукот и слично. Бадниковата вечер е збогатена и со гранчиња даб кои се симбол на истрајност, а свеќата е симбол на светлината кон големиот ден што доаѓа.
