Администрацијата на американскиот претседател Џо Бајден повлече носач на авиони од Персискиот Залив, што е потенцијален сигнал за намалување на тензиите со Иран, кои се зголемија за време на управата на поранешниот претседател Доналд Трамп.
Портпаролот на Пентагон Џон Кирби изјави дека ударната група предводена од УСС Нимиц испловила од Централната команда на САД на Блискиот исток кон Индо-Тихоокеанската команда.
Кирби не ја потврди информацијата дека Нимиц се враќа во САД по девет месеци пловење. Но, тој навести дека откако администрацијата на Трамп го засили американското воено присуство во Персискиот Залив, Владата на Бајден не гледа смисла да го држи носачот на авиони во регионот како неопходен за гарантирање на безбедноста на САД во регионот. Портпаролот не кажа дали Нимиц ќе биде заменет во регионот во блиска иднина, но нагласи дека американската морнарица има ограничен број носачи на авиони.
