Наместо закажаниот физички самит на лидерите на ЕУ во четврток и петок во Брисел, поради големиот пораст на бројот на заразени со коронавирус, ќе се одржи видео конференција, изјави денеска портпаролот на Европскиот совет, Баренд Лејтс.
– Претседателот на Европскиот совет одлучи да го одржи самитот во март со видео врска, по големото зголемување на бројот на заразени лица во земјите-членки, рече Лејтс, портпарол на Шарл Мишел.
Агендата на редовниот пролетен самит на ЕУ, на 25 и 26 март, што досега беше планиран како физички состанок, вклучува неколку теми: епидемиолошката состојба и координација на борбата против Ковид-19, производство и дистрибуција на вакцини, односите со Русија, ситуацијата на источен Медитеран, единствен пазар, индустриска политика, дигитална трансформација и меѓународна улога на еврото.
