Биотехнолошката компанија „Новавакс“ наскоро ќе достави целосни податоци до американската Администрација за храна и лекови (ФДА) за можна дозвола за итна употреба на нејзината протеинска вакцина против коронавирус, изјави извршниот директор Стенли Ерк.
„Ќе имаме податоци во САД, се надеваме пред крајот на годината“, изјави Ерк за Си-Ен-Ен, додавајќи дека доколку ФДА даде зелено светло, првите 100 милиони протеински вакцини ќе бидат подготвени за испорака.
Вакцината на Новавакс, наречена NVKS-CoV2373, направена е со малку поконвенционални методи од вакцините кои се веќе одобрени за употреба во Соединетите Држави.
Користени се мали, лабораториски направени парчиња коронавирус за да се стимулира имунитетот, што пристап со кој луѓето се повеќе запознаени или повеќе им одговара.
Извршниот директор, исто така, истакна дека вакцината за коронавирус на Новавакс може да се користи и како засилувач за луѓето кои првично ги примиле вакцините „Фајзер“, „Модерна“ или „Џонсон и Џонсон“.
„Новавакс“ објави дека Индонезија стана првата земја во понеделникот што ја одобри итна употреба на оваа вакцина против коронавирус.
Апликацијата за одобрување досега е поднесена во неколку други земји, меѓу кои Обединетото Кралство, Австралија, Канада, Нов Зеланд, Европската унија, Индија и Филипините.
„Новавакс“ соопшти дека го завршил процесот на доставување податоци за итна употреба на својата вакцина до Светската здравствена организација (СЗО).
„Всушност, поднесовме пријави до девет регулаторни агенции само во последните шест недели“, рече Ерк.
