Белгискиот премиер Александар Де Кро денеска во Европскиот парламент изјави дека демократиите и слободните вредности ќе бидат ставени на тест оваа година.
Во светло на можното враќање на Доналд Трамп во Белата куќа, белгискиот лидер рече дека „Европа не треба да се плаши од сценарио во кое би била оставена сама, без значителна помош од САД“. Премиерот на Белгија, која го презеде ротирачкото претседавање со ЕУ, им порача на претставниците во Европскиот парламент дека во 2024 година ќе бидат многу загрозени Европа и Западот, пишува Гардијан.
„Ова е година во која нашите демократии и нашите слободи ќе бидат тестирани и ставени на тест. Не само на изборите за Европскиот парламент, туку и на изборите за американскиот Конгрес и американски претседател“, рече Де Кро.
Тој рече дека во случај на победа на Трамп, ако ја врати политиката „Америка на прво место“ во 2024 година, Европа ќе биде осамена како никогаш досега. „Ние како Европејци не треба да се плашиме од таа перспектива, напротив, треба да ја прифатиме.“
„Треба да го прифатиме овој факт ставајќи ја Европа на поцврста основа. Европа која е посилна, посуверена, посамостојна. Европа која дава можности и прави разлика во животите на луѓето. Мораме да ги заштитиме нашите граѓани, да ги зајакнеме нашите економии и да се подготвиме за заедничка европска иднина“, заклучи белгискиот премиер.
