Јужна Кореја проценува дека Северна Кореја поседува меѓу 80 и 120 нуклеарни боеви глави, изјави денеска јужнокорејскиот министер за одбрана, Ан Гју-бак.
Ан Гју-бак пред пратениците во Парламентот рече дека проценката се темели врз податоци добиени од приватни истражувачки организации и оти јужнокорејската армија не може официјално да го потврди бројот.
Неговата проценка е значително повисока од онаа што вчера ја изнесе американскиот претседател Доналд Трамп, кој рече дека Северна Кореја има 57 нуклеарни боеви глави.
Јужна Кореја традиционално избегнува јавно да објавува детални проценки за севернокорејскиот нуклеарен арсенал и официјално не ја признава Северна Кореја како држава со нуклеарно оружје, во согласност со својата долгогодишна политика за денуклеаризација.
