Земјите-членки на БРИКС повикаа на максимална воздржаност на Блискиот Исток и на избегнување какви било дејствија што би можеле дополнително да ја влошат ситуацијата во регионот, се наведува во заедничката декларација усвоена на 18-тиот годишен самит на блокот што започна денеска во Њу Делхи.
Постигнувањето консензус за заедничката декларација претставува значаен дипломатски пробив, кој беше постигнат по преговори што траеја до раните утрински часови, соопштија дипломати од индиската Влада. Тие посочија дека во текот на консултациите се појавиле несогласувања за неколку спорни прашања, но под раководство на земјата домаќин, Индија, учесниците успеале да ги премостат разликите.
„Изразуваме длабока загриженост поради продолжувањето на ескалацијата на тензиите на Блискиот Исток“, се посочува во декларацијата, при што земјите од БРИКС ја потврдија својата позиција дека праведно и трајно решение на израелско-палестинскиот конфликт може да се постигне единствено со мирни средства. Во документот се повикува и на нулта толеранција кон тероризмот, како и на отфрлање на сите двојни стандарди во борбата против него.
Усвоениот документ добива уште поголемо значење бидејќи Иран, Саудиска Арабија и Обединетите Арапски Емирати учествуваат на самитот во Делхи и покрај длабоките разлики и нивните спротивставени позиции за низа регионални и геополитички прашања.
Делхи е домаќин на овој дводневен самит на БРИКС, на кој учествуваат лидерите на 11-те земји-членки и на 10-те земји-партнери, како и претставници на повеќе меѓународни организации.
