Навистина е жално што Бектеши чека од Град Скопје да му ги реши проблемите, реагира градоначалничката на Скопје Данела Арсовска во врска со проблемот со топлификацијата во градот.
– Додека најголемиот дел од европските земји се подготвуваа за справување со енергетската криза и уште пред една година носеа одлуки и мерки за да ги заштитат своите граѓани од несаканите последици, кај нас мерките доцнеа најмалку шест месеци и не беа доволни да ги санираат штетите кои настанаа од немањето на стратегија за решавање на енергетската криза. БЕГ е проблем на Владата. Министерот Бектеши треба да си ги знае сопствените надлежности и да ги реши проблемите на граѓаните, објави Арсовска на Фејсбук.
Да потсетам, додава Арсовска во објавата, министерот кој се сликаше со дониран зејтин кој не можеше сам да го обезбеди, нема право да зборува за туѓа способност.
– Градот Скопје нема законска обврска да му ги решава проблемите на Бектеши. И наместо да си бара „жртви“ за сопствената неспособност, да најде начин како да им излезе во пресрет на граѓаните кои живеат на раб на сиромаштија заради неговите „успешни“ економски политики. Ако треба да бидам и министер за економија, Бектеши нека си поднесе оставка, наведува Арсовска во својата реакција.
