Осум лица се обвинети за корупција, перење пари и учество во криминална организација по истрагата за сомнеж за поткуп во Европскиот парламент (ЕП), наводно во интерес на кинеската компанија Хуавеи, соопшти денеска белгискиот јавен обвинител.

Обвинителот наведе дека од осумте лица, тројца остануваат во притвор, тројца се задржани под електронски надзор, а двајца се ослободени, пренесе Ројтерс.

ЕП соопшти дека добил барање од белгиските власти а помогне во истрагата, како и дека наскоро ќе одговори на тоа.

Белгиските обвинители на 13 март објавија дека уапсиле неколку лица под сомнение дека примале мито во ЕП, наводно во корист на кинеската компанија Хуавеи.

Белгиските истражители извршија рација на 21 локација во Белгија и Португалија на 13 март, а оттогаш судијата нареди да се запечатат канцелариите на двајца помошници европратеници.

Обвинителите рекоа дека корупцијата се одвивала „многу дискретно“ од 2021 година под маската на комерцијално лобирање и вклучувала плаќања или подароци, како што се храна и патни трошоци.

Обвинителите рекоа дека поткупот бил во корист на Huawei. Компанијата објави дека сериозно ги сфаќа обвинувањата, како и дека води политика на нулта толеранција кон корупција и други прекршувања, пренесува Танјуг.