Рускиот претседател Владимир Путин и Доналд Трамп, кој наскоро ќе ја преземе функцијата претседател на САД, ќе седнат на преговарачка маса за да разговараат за ситуацијата околу Украина, изјави високиот претставник на ЕУ за надворешна политика и безбедност, Жозеп Борел.
„Сè укажува дека Трамп и Путин ќе седнат на преговарачка маса, а Украина ќе биде на менито. Неодамна бев во Украина и разговарав со Володимир Зеленски за оваа можност и нему му е јасно дека е подготвена одлуката на САД и Русија, но тој нема да го прифати тоа, што е разбирливо“, рече Борел во интервју за радио станицата Cadena SER.
Тој вчерашното руско лансирање на балистичка ракета со среден дострел „Орешник“ врз украинскиот воено-индустриски комплекс во Днепар го оцени како „загрижувачки“.
„Да се лансира проектил со овие карактеристики, кој е дизајниран да лета десетици илјади километри и да носи нуклеарно оружје… Ова е јасно загрижувачко предупредување. Не затоа што Украина користела многу конвенционално оружје за напад на руска територија, туку затоа што Русија сака да покаже дека има воен капацитет што Украина го нема“, истакна Борел.
