Украина се соочува со „клучен момент“ додека претседателот Володимир Зеленски се подготвува да го посети Лондон за разговори за мировните предлози, изјави висок британски министер.
Украинскиот претседател утре ќе се сретне со британскиот премиер Кир Стармер во Лондон, заедно со францускиот претседател Емануел Макрон и германскиот канцелар Фридрих Мерц.
Нивната средба доаѓа во услови на продолжени разговори меѓу украинските и американските претставници за планот поддржан од Вашингтон за ставање крај на војната.
Министерот во британскиот Кабинет, Пет Мекфејден денеска изјави дека безбедноста и самоопределувањето на Украина ќе бидат „во срцето“ на дискусиите на лидерите.
– Принципот зад разговорите ќе биде Украина да може да одлучува за сопствената иднина. Ова е навистина клучен момент сега. Сите сакаат војната да заврши, но сакаат таа да заврши на начин што ѝ дава на Украина слобода на избор во иднина. Значи, тоа не значи само крај на војната, туку и безбедносни гаранции за Украина во иднина, а не целосно безлична организација која не може да одлучува за својата иднина, изјави тој за Скај Њуз.
Велика Британија постојано се залага за секој мировен договор да вклучи безбедносни гаранции за Украина, како од САД, така и во форма на „коалицијата на подготвените“ предводена од Британија и Франција, пренесе ДПА.
Стармер минатиот месец ги повика лидерите на земјите од коалицијата да ги зацврстат своите обврски за потенцијални мировни сили кои би можеле да бидат распоредени во Украина во случај на прекин на огнот.
Русија постојано ја отфрла можноста за стационирање сојузнички трупи во Украина и продолжува да бара големи делови од украинската територија во замена за мир.
Утрешниот состанок доаѓа и по неколкудневни разговори меѓу американските и украинските претставници, додека Белата куќа го притиска Киев да прифати договор. Преговарачите во Флорида признаа дека секој „вистински напредок“ ќе зависи „од подготвеноста на Русија да покаже сериозна посветеност на долгорочен мир“.
Мекфејден денеска изјави дека Украина може да смета на „силната солидарност“ од Обединетото Кралство и нагласи дека секое решение не треба „да ја награди руската агресија“.
