Четворица банкари кои му овозможиле на пријателот на Владимир Путин да депонира огромни суми во швајцарските банки се прогласени за виновни за небрежност.
Поранешните директори на филијалата на руската Газпромбанк во Цирих добија високи казни затоа што му помагале на рускиот музичар Сергеј Ролдугин да ги пере парите за кои се верува дека му припаѓаат на Путин.
Тројца од осудените банкари се Руси, а еден е Швајцарец. Тие се казнети со вкупно 741.000 швајцарски франци. Обвинетите, чиј идентитет не е објавен во согласност со швајцарскиот закон, имаат намера да поднесат жалба на одлуката на судот.
Ролдугин, наводно, депонирал 50 милиони долари на швајцарски сметки во периодот од 2014 до 2016 година без веродостојно објаснување за тоа како ги добил парите. Во тоа време се претставувал како виолончелист со скромни примања. Се прославил како музичар, но не заработувал големи суми. Тој еднаш за Њујорк Тајмс изјавил дека не е бизнисмен, а особено не е милионер.
Затоа се наметнало прашањето од каде има толку милиони во швајцарските банки. Имено, добро било познато дека виолончелистот е близок пријател на Путин, а дури се шпекулирало дека и е кум на ќерката на Путин, пишува Би-Би-Си.
Според швајцарскиот закон, банките се обврзани да ги отфрлат или затворат сметките доколку постојат сомневања за сопственикот на сметката или за изворот на парите. Со големо внимание треба да се однесуваат и кон „политички експонираните лица“. Како познат пријател на рускиот лидер, кој инвестирал милиони во Швајцарија по нелегалната анексија на Крим и последователните санкции против Русија во 2014 година, Сергеј Ролдугин требало да предизвика сомневања кај обвинетите банкари.
Овој скандал први во јавноста го изнесоа новинари кои пронашле докази за сомнителни трансакции, меѓу кои се и оф-шор компаниите на Ролдугин вредни стотици милиони долари, како и неговите сметки во швајцарската банка.
Дури откако овие докази се појавиле во медиумите, швајцарското обвинителство започнало сопствена истрага. Во нивното обвинение се наведува дека музичарот делувал како „паричник на Путин“ канализирајќи средства преку лажни компании во Кипар и Панама до Гаспромбанк во Цирих.
