Еден од поранешните најбарани бегалци, шефот на мафијата, Матео Месина Денаро, фатен во средината на јануари по 30 години бегство во Палермо додека се лекувал на Клиниката за онкологија, сега е во неповратна кома, соопштија извори од болницата.
Денаро (61), кој е хоспитализиран во затворското одделение на болницата Аквила, нема да излезе од кома и лекарите ќе ја прекинат неговата исхрана, соопштија анонимни извори, пренесува Анса.
Месина Денаро е во болница повеќе од еден месец. Операцијата на дебелото црево на која бил подложен на 8 август била успешна, но напреднатиот рак на дебелото црево предизвикал неповратно влошување на неговата здравствена состојба, велат изворите.
Шефот на Коза Ностра беше осуден за учество во десетици убиства, вклучително и бомбашките напади во 1992 година во кои загинаа обвинителите Џовани Фалконе и Паоло Борсели.
Покрај атентатот на Фалконе и Борселино, овој моќен мафијашки бос од Трапани беше осуден и за убиството на Џузепе ди Матео, 12-годишниот син на мафијаш кој стана државен сведок, а кој беше задавен и стопен во киселина во 1996 година.
Тој беше осуден и за бомбашки напади на уметнички и верски објекти во Милано, Фиренца и Рим во 1993 година, во кои загинаа 10 лица, а 40 беа повредени.
