Вицепремиерот за европски прашања, Бујар Османи, порача дека ДУИ останува на ставот дека додатокот за трето дете е добра мерка.
Откако Министерството за труд и социјална политика, со кое раководи неговата колешка од СДСМ, Мила Царовска, оцени дека се потребни измени за оваа мерка на површина излегоа и разликите помеѓу коалициските партнери, ДУИ и СДСМ, по ова прашање.
Османи оценува дека е потребна јавна дебата, но дека за ДУИ за сега нема убедливи аргументи дека мерката е лоша.
– Во таа јавна дебата сметаме дека не се анализирани комплетно бенефитите од една таква мерка и дека не е добро да се укине тој додаток бидејќи нашите анализи покажуваат дека напротив има резултати од една таква мерка, смета Османи.
Вицепремиерот повика дека прашањето е отворено за јавноста да дебатира, но дека не стигнало до Владата.
– Не е ова некоја расправа во Владата бидејќи прашањето не е стигнато до Владата, тоа прашање е отворено за јавна дебата со цел токму ова да се постигне, политичките партии, граѓанските здруженија, граѓаните, експертите да кажат мислење и потоа министерството врз основа на тие мислења да го комплетира предлогот. Дали ќе го пушти до Влада или нема, изјави Османи за МИА.
Околу проблемот со непојавувањето на вицепремиерот задолжен за спроведувањето на Рамковниот Договор, Хазби Лика, Османи смета дека е на лидерите на политичките партии да одлучат дали треба да се прави реконструкција на Владата или измени во кадровските решенија.
– Сепак претседателите на политичките партии кои ја сочинуваат коалицијата имаат право да проценат за резултатите на Влада, на поединечни кадровски решенија или пак да понудат измени на тие кадровски решенија, ние сме министри предложени од овие политички лидери и ја завршуваме нашата работа согласно законот и ја реализираме програмата на Владата. На господинот Заев и на господинот Ахмети е таа одлука.
Околу истрагата на СЈО која се води против него, вицепремиерот смета дека за владеењето на правото се потребни два елементи: да нема неказнивост и да се почитува презумпцијата на невиност, и дека ниту еден од овие елементи не смее да биде нарушен. Тој бара „нормалност“ во процесот и смета дека доколу се утврдат фактите, “тогаш ќе дојде прашањето за моралниот и легалниот кредибилитет“.
– Државниот завод за ревизија прави истраги на дневна основа, тоа се ревизии на сите потписи што ги ставаат министрите и тоа е нормален процес, никој не поднел оставка затоа што Државниот завод за ревизија наоѓа забелешки, истото треба да го воведеме како принцип кај нас: да има истраги на дневна основа за секого, дури и во јавноста имаме шпекулации за министри, директори, можни злоупотреби. Истраги треба да почнат денес, за сите, бидејќи сме еднакви пред законите.
