Најприфатливиот електричен автомобил на BYD на кинескиот пазар штотуку стана уште поевтин. По натамошните намалувања на цените, почетното ниво на „Seagull EV“ сега се продава за околу 7.800 евра, што дополнително ја зајакнува борбата во сè пожестоката ценовна војна во индустријата за електрични возила.
Во април, кинескиот производител на возила најави промоција на неколку модели од својата серија „Ocean“, меѓу кои и „Seagull“. Цената за основната верзија на „Vitality“, која претходно немаше напредни опции, е намалена од околу 9.500 евра на споменатите 7.800 евра.
Оваа стратегија за намалување на цените е дел од поширокиот тренд кај кинеските производители, кои се обидуваат да ја зајакнат својата позиција на домашниот пазар во услови на зголемена конкуренција. Покрај привлекувањето нови клиенти, ваквите понуди имаат за цел и да го задржат уделот на пазарот во сегментот на електрични автомобили со пристапни цени.
Моделот „Seagull“ се нуди во три верзии на опрема: Vitality, Freedom i Flying. Купувачите можат да изберат помеѓу две литиум-јонски батерии, 30,1 kWh и 38,9 kWh, кои обезбедуваат опсег од 305 km и 405 km соодветно според кинескиот стандард CLTC.
Она што го прави овој модел особено привлечен е неговата компактна големина, должина од 3.780 mm, ширина од 1.715 mm и висина од 1.540 mm. За споредба, тој е помал дури и од поранешниот Chevrolet Bolt EV, а по димензии е најблиску до европскиот Fiat 500e.
Продажбата на електрични возила од BYD постојано се зголемува. Само минатиот месец се продадени повеќе од 377.000 нови електрични и хибридни возила. Вкупниот број на продадени возила во 2025 година надмина еден милион единици, а важна улога во овој успех одигра и „Seagull EV“.
Освен во Кина, овој мал градски EV веќе се продава и на други пазари под различни имиња, во Мексико и Бразил како Dolphin Mini, додека во Европа ќе се појави под името Dolphin Surf, со цена под 20.000 евра.
Иако тоа нема да биде најевтиното електрично возило во Европа, потпретседателката на BYD Стела Ли рече дека Dolphin Surf ќе биде „најдобрата вредност што клиентот може да ја добие за своите пари“. Компактните димензии, пристапната цена и пристојниот опсег ќе го направат сериозен конкурент во сегментот на градските EV модели.
Се очекува овој модел да привлече првенствено помлади возачи и жители на урбаните средини, за кои се важни ниските трошоци за одржување и лесното паркирање. Исто така, планираната поддршка за брзо полнење и модерен мултимедијален систем би можеле дополнително да ја зголемат неговата атрактивност на европскиот пазар.
