За да бидеме веродостојни, верувам дека мора да зборуваме за времето и домашните задачи. И јас имам предлог. Додека ја подготвуваме следната стратешка агенда на ЕУ, мора да си поставиме јасна цел. Верувам дека мора да бидеме подготвени – од двете страни – до 2030 година за проширување – порача првиот човек на ЕУ од Блед и доби аплауз од присутните.
До 2030 година, двете страни – ЕУ и земјите кандидатки – мора да бидат подготвени за ново проширување на Европската Унија, порача претседателот на Европскиот совет, Шарл Мишел, во својот говор на денешниот Бледски самит и доби аплауз од присутните.
За да биде посилна и побезбедна, ЕУ треба да ги зајакне нашите врски и да стане помоќна и затоа сега е време да се справиме со предизвикот на проширувањето. И за нас во ЕУ … и за нашите идни земји членки, рече Мишел пред присутните.
„Да, верувам дека вака сега треба да ги нарекуваме земјите со потврдена ЕУ перспектива, идни земји-членки. Време е да се соочиме со предизвиците со јасност и искреност. Патот кон ЕУ за Западен Балкан започна пред повеќе од 20 години. Самитот во Солун, во 2003 година, ја потврди европската перспектива на Западен Балкан. Но, бавното темпо на ова патување во ЕУ разочара многумина. И во регионот … и во ЕУ. Се согласувам со канцеларот Шолц кога вели дека Европа мора да ги исполни своите ветувања. Така што сега проширувањето повеќе не е сон. Време е да се оди напред. За да бидеме веродостојни, верувам дека мора да зборуваме за времето и домашните задачи. И јас имам предлог. Додека ја подготвуваме следната стратешка агенда на ЕУ, мора да си поставиме јасна цел. Верувам дека мора да бидеме подготвени – од двете страни – до 2030 година за проширување. Ова значи дека следниот долгорочен буџет на ЕУ ќе треба да ги вклучи нашите заеднички цели. Ова е амбициозно, но неопходно. Тоа покажува дека сме сериозни“, истакна Мишел и додаде дека лидерите на ЕУ ќе разговараат за проширувањто на некои од следните состаноци на Советот.
Тој рече дека се согласува со францускиот претседател Емануел Макрон оти би било фундаметална грешка ако ЕУ не се реформира пред следното проширување.
„Да бидеме искрени, понекогаш го користевме недостатокот на напредок на идните земји членки за да избегнеме да се соочиме со сопствената подготвеност. Сега мора сериозно да го разгледаме капацитетот на ЕУ да апсорбира нови членки. Оваа идеја понекогаш е погрешно сфатена како скриена пречка за пристапување“, истакна Мишел.
Тој во својот говор се осврна и на билатерлните конфликти од минатото и порача дека нивното решавање може да биде поболно од реформите, но истакна дека е неопходно.
„Нема соработка без помирување. И морам јасно да кажам: нема простор за конфликти од минатото во ЕУ. Вашите луѓе, особено младите, сакаат да бидат инспирирани од посветла, поправедна и попросперитетна иднина. Приклучувањето кон нашата Унија би било одличен доказ за колективен успех. Идеално, сите би се здружиле. Сепак, идните земји членки се во различни фази на нивниот пат кон ЕУ. Но, треба да се погрижиме минатите конфликти да не се внесуваат во ЕУ. И да се користат за блокирање на пристапот на нивните соседи и идните земји членки. Еден начин може да биде да се додаде таканаречена ‘клаузула за доверба’ во договорите за пристапување за да се осигура дека земјите кои штотуку се приклучиле, не можат да ги блокираат идните земји членки“, изјави Мишел.
Изјавата на Мишел дека ЕУ мора да биде подготвена за ново проширување до 2030 година, брифираат од Владата, ја легитимира и нашата политика на она што власта го определи како целна година за членство на С Македонија во ЕУ.
На 18. стратешки форум во Блед, кој годинава се одржува на тема „Солидарност за глобална безбедност“, а кој ќе трае утре и задутре, премиерот Димитар Ковачевски е придружуван од вицепремиерот за европски прашања, Бојан Маричиќ, и министерот за надворешни работи, Бујар Османи.
