Денеска, АКТ прави уште едно разоткривање. Во средината на политичко-финансиската мрежа на оската Орбан – Вучиќ – Мицкоски, преку нивните партии, банки, бизнис-интереси и лажни договори за реклами, има и клучен пропаганден столб: телевизијата „Алфа“ . Денеска, ќе ја разоткриеме заднината на оваа пропаганда, на политичките врски и бизнис-мрежите. Граѓаните ќе видат зошто токму преку телевизијата „Алфа“ се водат црните кампањи, хајки, јавниот линч врз СДСМ и претседателот Филипче. Зошто оваа телевизија дејствува како политичка алатка на ВМРО? Зошто Жан Митрев беше искористен? Ништо не е случајно, се вели во соопштението на СДСМ од денешната прес-конференција на Јон Фрчкоски, член на Извршниот одбор на СДСМ, што МИА го пренесува интегрално.

Првин да видиме кој стои зад ТВ „Алфа“?

Петер Шац, унгарски медиумски бизнисмен и човек од тесниот круг на Виктор Орбан. Преку компанијата CHS Invest Group, Шац контролира 57 % од „Алфа скоп“ ДОО, фирма стопроцентен сопственик на телевизијата.

Контролата ја презеде во 2017 година – токму во периодот кога Орбан почнува агресивна експанзија на своето медиумско влијание на Балканот.

Петер Шац е познат по блиските врски со Виктор Орбан и неговата партија Фидес, при што неговите медиумски активности често се користат за промоција на агендата на Орбан вклучувајќи ширење пропаганда и финансиски трансакции, кои биле под истрага поради сомнежи за перење пари.

Пред тоа „Алфа“ била во сопствеништво на српски бизнис-структури, меѓу кои и групацијата Comtrade на Веселин Јевросимовиќ – човек со документирани релации со Александар Вучиќ и СНС.

Континуитетот е очигледен: сопствениците се менуваат, политичката линија останува иста.

Орбан е поврзан со бизнисите на Шац, но особено е важна врската со Хабоњи и поддршката за Груевски (кому Орбан му даде азил).

Во 2020 година Шац беше обвинет за даночна измама во Северна Македонија поради непријавување приход од 190.000 евра во неговата компанија CHS Invest Group.

Истражувањата на ИРЛ и Oštro покажаа дека таканаречените рекламни договори (маслиново масло, сувенири, онлајн-продавници без реален пазар) биле користени како механизам за трансфер на милиони евра кон медиуми под контрола на Шац.

Купувањето на Стопанска банка АД Битола од страна на Алта банка, сопственост на Давор Мацура, банкар близок до Вучиќ, отвора сериозни прашања дали истиот механизам (банки – реклами – медиуми – политичко влијание) повторно се активира, овој пат преку српско-унгарска оска во услови кога ВМРО-ДПМНЕ е на власт.

Не случајно е што кујните на ВМРО, порталите, како „Плусинфо.мк“ и „Експрес.мк“, се преплавени со реклами поврзани со Алта банка.

Дури и логото на „Алфа“ и на Алта банка се слични, сменети во иста година.

Дали сега се појасни навредите и нападите што доаѓаат од Бетмен, Героски, Ивона Талеска?

Сега доаѓаме и до Жан Митрев. Човекот кој токму на ТВ „Алфа“ почна црна кампања и јавен линч против претседателот Филипче со изнесување лаги.

Освен што беше обвинет дека со умисла довел во заблуда 283 пациенти во неговата клиника, кои други активности го поврзуваат Жан Митрев со оваа оска?

Тим на болницата „Жан Митрев“ ја претставувал Македонија на меѓународен турнир во walking footbal“ во Будимпешта во 2025 година.

Финансиран преку македонскиот државен Фонд за здравство.

Еден од тимовите учесници на овој турнир е Фехервар од Унгарија, тим поврзан со поранешниот клуб „Видеотон“, каде што играл Орбан. Киниши е вториот тим учесник на турнирот со Жан Митрев, исто така од Унгарија.

Да појасниме, Орбан е познат по својата опсесија со фудбалот – тој е поранешен играч, голем фан и го користи спортот како дел од својата политика.

Ништо не е случајно.

Прашање е дали кога Жан Митрев бил во Будимпешта, се сретнал со својот драг пријател Никола Груевски, голем помагач на неговата болница уште од самото основање?

Колку средства добил од буџетот на Фондот за здравство во 2025 година?

Дополнително, Клиниката „Жан Митрев“ учествувала на 56. меѓународен саем за туризам во Нови Сад (одржан од 27 до 29 ноември 2025 година. Добила и награда за придонес кон иновациите и професионалниот пристап на клиниката како водечка дестинација за медицински туризам.

Министерството за култура и туризам на Северна Македонија како дел од Владата било поддржувач, а наградата ја врачил македонскиот министер Зоран Љутков.

Нови Сад не е случајна точка на мапата. Со години градот беше под директна контрола на Милош Вучевиќ, долгогодишен градоначалник, претседател на СНС, поранешен премиер и денешен советник на Вучиќ за регионални прашања.

Токму таму се вкрстуваат интересите: саеми, бизниси, банки, здравствени институции, политички покровителства. Таму се доделуваат награди, се градат регионални партнерства и се цементираат неформалните врски меѓу владејачките елити.

Не случајно е формирано и здружението „ВМРО-ДПМНЕ Србија“, предводено од Марјан Јованоски, поранешен дипломат и кадар од времето на Антонио Милошоски. Ова не може да се чита изолирано.

Во комбинација со блиските односи меѓу ВМРО-ДПМНЕ и СНС станува јасно дека станува збор за регионално политичко позиционирање, а не за културно здружение.

Доаѓаме до заклучокот за оваа политичка, бизнис и медиумска оска – Орбан – Вучиќ – Мицкоски.

Телевизијата „Алфа“ не е само медиум. Таа е политички проект.

Проект што произлегува од пропагандна матрица, финансиран преку сомнителни шеми, со документирани врски со политичка и бизнис-структура на оската Орбан – Вучиќ – Мицкоски.

Постојаните црни кампањи, нападите врз опозицијата, врз СДСМ антиамериканските и анти-ЕУ наративи не се грешка на новинар. Тие се директен производ на сопственичката, финансиската и на политичката структура зад медиумот.

Како и во времето на Груевски, „Алфа“ повторно функционира како центар за црни кампањи, јавен линч и координирани напади, овој пат со регионална поддршка.

Ова е нивното разоткривање!

Центар за комуникации со јавноста на СДСМ

Фото: СДСМ