Амбасадорот на ЕУ, Дејвид Гир вели дека сите земји кои сакаат да се придружат на ЕУ, треба да ги применуваат стандардите за човекови права. Тоа се очекувањата, нагласува тој, и како тоа се одвива во една земја кандидат го следи Советот на Европа.

Гир во интервју за телевизија Телма додава дека и покрај тоа што во јавноста има многу различни мислења за отворањето на Уставот со цел да се направат потребните измени, односно да се внесат Бугарите во него, всушност треба сите да размислат што би значела таа измена во пракса.

-Промената на Уставот како прво е суверена одлука која треба да ја донесе оваа земја. Секако во право сте, слушаме многу различни гласови и тоа е на увид на јавноста. Мислам дека е важно да се повлечеме еден миг и да се запрашаме што е всушност оваа уставна измена или што значи во пракса. Во реалноста, тоа значи да се вклучи во Уставот, референца на поединците, граѓани на државата, кои се идентификуваат како Бугари. Тоа е суштината. Нема промена на суштинската природа на Уставот. Не се допира во идентитетот на земјата или нејзините суштински интереси. Оваа земја веќе има добри резултати на меѓуетнички односи. Овие промени се промени кои може да се спроведат, кои треба да се анализираат на објективен начин, треба да се повлечеме малку и да ги видиме. Да направиме споредба на пример со некои други земји. На пример, Хрватска, која во својот Устав вклучува повеќе од 20 заедници, вклучувајќи ги и Бугарите, Албанците и Македонците. Тоа не ја промени суштинската природа на Уставот или пак имаше последици на интересите на државата. Мислам дека е најважно да се спроведе дебата, која ќе земе предвид за што точно се работи. И да се обидеме да се тргнеме на страна од некаква повисока реторика која не ни помага да видиме за што станува збор, вели Гир.

Тој додава дека подготвени се да разговараат со сите за да објаснат како ЕУ гледа на тоа, но на крајот од денот, одлуката треба да ја донесе земјава.

Евроамбасадорот во интервјуто говори и за корупцијата, за која смета дека е најголемиот предизвик кој земјава мора да го реши, бидејќи сето тоа влијае врз правата на граѓаните, пристапот до образование, здравјето, вработувањето, унапредувањето.

-Сега, во глобала, имаше некои позитивни чекори во оваа област, одредени закони беа усвоени, некои институции веќе ефикасно работат, како Државната комисија за спречување корупција, како некои од ревизорските органи кои вршат важна работа. Но, како што знаете, законската регулатива не е доволна, таа треба да биде имплементирана, а ако не е имплментирана, мора да биде спроведувана. Што се однесува до судството, да, има некои индивидуи, има некои делови од судството и обвинителството, кои ја вршат работата која треба да ја вршат, но мислењето на јавноста за судството е навистина многу ниско. Затоа судството и обвинителството треба на јавноста да ѝ демонстрираат, треба преку постапки да ѝ покажат, дека може да има доверба оти овие институции ќе ја спроведат правдата, вели евроамбасадорот Гир.

Истакнува дека Владата мора да ја одигра водечката улога, но и другите институции како и медиумите.