Под драконски безбедносни мерки и оваа година ќе биде Атина во пресрет на 17 ноември кога се одбележува годишнината од студентскиот бунт против хунтата, а според грчките медиуми ангажирани ќе бидат над 5.500 полицајци, јави дописничката на МИА од Атина.
Денеска започна тридневната прослава, која в четврток ќе кулминира со традиционални собири и протестен марш од Политехничкиот факултет (онаму каде што започна бунтот во 1973 година) до американската амбасада во Атина.
Според грчката новинска агенција АНА-МПА, безбедносните мерки во Атина се идентични со оние од 2019 година, односно пред пандемијата, а освен над 5.500 полицајци, ангажирани ќе бидат дронови и хеликоптер, полицајци во цивил, како и цистерни со вода во случај да има инциденти.
Министерот за цивилна заштита на Грција Такис Теодорикакос говорејќи за грчката телевизија „Скај“ вчера повика мирно да се одбележи годишнината од бунтот.
-Грчката полиција и Министерството во многу тесна соработка со ректорските власти и организаторите, ги презедовме неопходните мерки за заштита на безбедноста на луѓето кои ќе протестираат, на луѓето кои ќе се движат во останатиот социјален и економски живот на градот, а секако и на имотите на луѓето. Барам од организаторите, од сите кои ќе учествуваат, да придонесат за прославата да биде апсолутно мирна, истакна Теодорикакос.
