Германија има намера да се фокусира на земји надвор од Европа, како што се Бразил, Мексико и Индонезија во потрагата по работна сила, изјави министерот за труд Хубертус Хајл за дневниот весник „Ноје оснабрикер цајтунг“.

„Заедно со претставниците на економијата, работиме на стратегија во земјите каде што има многу повеќе млади и добро квалификувани работници на пазарот на трудот, отколку што домашните пазари на труд можат да апсорбираат“, рече министерот за труд Хубертус Хеил (Социјалдемократска партија на Германија СПД) во интервју за дневниот весник Ноје Оснабрикер Цајтунг.

Хејл рече дека ќе се внимава да не се лиши домашниот пазар на труд од потребните експерти. Тој изјави дека е „вин-вин“ ситуација.

„Ние профитираме, но и земјите на потекло. Ќе инвестираме во стручно оспособување на младите на лице место, а луѓето кои ќе дојдат во Германија ќе профитираат од добро платената работа што им дава можност да ги финансираат своите семејства дома“, рече Хејл.

Во јуни, Хејл треба да отпатува во Бразил со министерката за надворешни работи Аналена Баербок за да разговара за можноста за доведување поголем број негувателки, кои се многу потребни на германскиот пазар на труд.

Слични договори треба да се склучат и со Мексико и Индонезија, а Хејл веќе ја посети Гана во февруари со истата цел.

Како што јави јавниот сервис АРД, германската влада води разговори за привлекување работна сила и со Колумбија, Тунис, Мароко, Египет, Индија, Филипини и Виетнам.

Покрај квалификуваната работна сила во областа на грижата, од споменатите земји треба да пристигнат и други работници кои му се потребни на германскиот пазар на труд.

Како што соопшти Институтот за германска економија (IW), на крајот на 2022 година во агенциите за вработување во Германија биле пријавени над 630.000 работни места кои не можеле да се пополнат поради недостаток на одредена работна сила.

Има само 33 соодветно квалификувани работници на сто отворени работни места во секторот за нега.

Претседателот на Фондацијата за заштита на пациенти, Еуген Бриш, истовремено го критикуваше масовниот увоз на медицински сестри и посочи дека потенцијалот за полесно пополнување на отворените работни места во секторот за нега постои и сега во Германија, но дека условите за работа треба да се подобрат со цел да се искористи овој потенцијал и работните места да станат поатрактивни.

„Неколку стотици медицински сестри од Бразил нема да ги решат овие проблеми. Треба да ги подобриме условите во овој сектор“, рече Бриш. Тој предупреди дека многу поранешни старатели се преквалификувале за помалку стресни и подобро платени занимања.

Се проценува дека приватниот сектор на грижа за друго лице веќе би пропаднал без многуте работници од Источна Европа кои се вработени во домаќинствата. Просечната годишна бруто плата во секторот згрижување е околу 40.000 евра.