Склучувањето договор меѓу Меѓународната агенција за атомска енергија (МААЕ) и Иран за инспекции на објекти на иранската нуклеарна програма е „целосно можно“, но е „ужасно тешко“, изјави денеска генералниот директор на МААЕ, Рафаел Гроси.
„Се вративме во Иран по 12-дневната војна што започна со нападите на Израел и САД врз објекти на иранската нуклеарна програма во јуни минатата година, каде успеавме да ги провериме сите објекти освен тие кои беа бомбардирани“, рече Гроси на Минхенската безбедносна конференција.
Успеавме, посочи тој, да воспоставиме форма на дијалог што беше несовршена, сложена и исклучително тешка, но сè уште постои.
„Затоа мислам дека најголемото прашање во моментов е како да се дефинираат различните чекори на овој дијалог во иднина, а ние многу добро знаеме што и како треба да се провери“, нагласи генералниот директор на МААЕ. (МИА)
