Хамас и другите палестински фракции денеска ги отфрлија разговорите за ослободување на израелските заложници, додека Израел не ги запре воените напади врз Појасот Газа.
Во соопштението на Хамас се наведува дека таквиот потег е одраз на „палестинската одлука на национално ниво“, пишува Гардијан.
Како што се посочува, „не треба да се зборува за затвореници или договори за размена на заложници, освен по целосно прекинување на агресијата.
„Тајмс оф Израел“ додава дека неименуван израелски функционер, во изјавата што ја пренесоа израелските медиуми, го обвини Хамас дека се обидува да го условува ослободувањето на заложниците со крајот на војната.
„Тоа нема да се случи“, рече тој.
Околу 120 Израелци се уште се во заробеништво на Хамас и паравоената организација Исламски џихад.
Повеќе од 100 израелски заложници и стотици палестински затвореници беа ослободени како дел од претходниот договор, кој предвидуваше привремен прекин на непријателствата.
Лидерот на Хамас, Исмаил Ханије, кој живее во Катар, оваа недела отпатува за Каиро на разговори со египетските власти, кои се обидуваат да посредуваат за нов договор меѓу Хамас и Израел, но средбата заврши без резултати.
