Израелските одбранбени сили (ИДФ) го осудија однесувањето на некои од нивните војници кои беа снимени како пеат и се молат во џамија во Џенин на окупираниот Западен Брег.

Ова се случи за време на операција против милитанти во градот, во која досега се убиени 11 Палестинци, соопшти палестинското Министерство за здравство.

ИДФ најави дека војниците „ќе бидат соодветно санкционирани“. Тие додадоа дека ќе дејствуваат и во други слични случаи регистрирани во Газа. На социјалните мрежи се шират неколку видеа на кои се гледаат сцени од џамијата. На една снимка, одекнува песна за бркање на темнината, поврзана со актуелниот еврејски празник Ханука, преку звучниците во минарето.

Лицето што снима се смее и се придружува на песната. Други клипови покажуваат војници во џамија како рецитираат еврејска молитва на микрофон. Палестинското Министерство за надворешни работи го осуди како што го нарече „исмејување на светоста“. ИДФ во денешното соопштение потврди дека војниците „дејствувале против кодексот на однесување на ИДФ во верска институција“.

Во соопштението за печатот се наведува дека одговорните биле „веднаш отстранети од оперативните активности“. „Однесувањето на војниците на видеата е сериозно и целосно е во спротивност со вредностите на ИДФ“,е истакнато. Инцидентите во Џенин не се првпат израелските војници да добиваат прекор поради лошото однесување кое било снимено, а потоа објавено на социјалните мрежи.

Така се појавија низа проблематични видеа: војник крши продавница за играчки, додека лицето зад камерата се смее; војници кои палат алишта во задниот дел на камион и друг кој претура по женска облека во нешто што изгледа како приватна резиденција. Во неделата, портпаролот на ИДФ, контраадмирал Даниел Хагари, го осуди однесувањето на војниците, пишува Би-Би-Си.

„Силите на ИДФ функционираат во согласност со вредностите и духот на ИДФ. Од војниците на бојното поле се бара да се однесуваат професионално и етички, а ние нема да правиме компромиси за ова. Во секој случај, видеата не се во согласност со вредностите на ИДФ, ќе бидат преземени командни и дисциплински чекори“, рече тој.