Рускиот амбасадор во ОН Василиј Небензја ја напушти седницата на Советот за безбедност посветена на Украина.
Тој ја напушти седницата пред изјавата на претставникот на Украина, наведувајќи дека има закажана средба со генералниот секретар на ОН, Антонио Гутереш.
„Ве молам, не сметајте го ова за демонстративно заминување. Морам да ја напуштам оваа седница поради претходно закажаната средба со генералниот секретар на ОН на агендата на нашето претседателство“, рече Небензја, пренесува ТАСС.
Рускиот претставник во Советот за безбедност претходно ги обвини САД дека создаваат хистерична атмосфера во однос на Украина.
„Не ни треба оваа паника“, рече тој.
Тој покажа документи за министри во Украина кои, како што рече, тврдат дека нема закана од руска агресија, а активностите на Вашингтон ги нарече пропаганда.
„Нашите американски колеги мора да ги претстават вистинските информации за ова“, рече тој.
Тој ги повика сите да не станат плен на провокации.
Претставничката на САД изјави дека Вашингтон побарал состанок на Советот за безбедност поради активностите на Русија на границата со Украина.
„Тие тврдат дека е на нивна територија, но е блиску до границата на нивните соседи, тие се соседи на кои Русија им ја окупирала територијата“, рече таа.
По заминувањето на амбасадорот Небензје, збор зеде постојаниот претставник на Украина во Обединетите нации, Сергеј Кишлица, а Русија потоа ја претставуваше Дмитриј Полјански, првиот заменик постојан претставник на Руската Федерација во ОН.
„Од каде ја добивте идејата за 100.000 војници?“
„Би сакал да поставам прашање, не само на нашите американски колеги, туку и на оние кои спомнаа од каде е бројката од 100.000 војници, кои се, како што тврдите вие, на руско-украинската граница“, рече Небензја. додавајќи дека не ја потврдиле таа бројка.
Тој потсети дека Русија често распоредува војници на своја територија без да предизвикува хистерија.
Тензиите меѓу Русија и Соединетите Држави поради трупањето на московските трупи во близина на Украина се прелеаа во Советот за безбедност на Обединетите нации, каде што дипломатите од двете земји жестоко ги изразија своите ставови.
И покрај повикот на Москва до членовите на Советот за безбедност да гласаат против таканаречената мегафон дипломатија, тоа тело најмногу се согласи со американскиот апел да се одржи јавна седница за кризата во Украина.
Кина беше единствената против, која ги повика нациите да го напуштат менталитетот на Студената војна, додека Индија, Габон и Кенија беа воздржани, но преостанатите 10 членки поддржаа отворен состанок.
Американците се огорчени поради масовното акумулирање на руски војници на границата со Украина, додека Русите ги негираат плановите за напад, тврдејќи дека немаат никаква врска со внатрешната криза во таа земја. Европската унија се држи до двонасочна патека – дипломатија и одвраќање на Русија од напад.
„Заканата од агресија на границата на Украина е провокација. Нашата изјава за фактите на теренот не е провокативна“, изјави американската амбасадорка во ОН Линда Томас-Гринфилд на седницата на Советот за безбедност на ОН.
Томас Гринфилд ги повтори обвинувањата дека Русија има повеќе од 100.000 војници на границата со Украина и дека Москва „се подготвува да ја нападне Украина“.
Според неа, Вашингтон има докази дека Москва планира да распореди уште 30.000 војници во Белорусија во првите денови од февруари.
