Епидемиолошката состојба во Италија е стабилна, но може да биде пауза пред новиот побрз раст на ширење на Ковид-19, изјави претседателот на Високиот институт за здравство, Силвио Брусаферо, на редовна прес-конференција.
За еден ден починале 316 пациенти болни од Ковид-19, а со тестирањето на повеќе од 300.000 луѓе откриени се речиси 14.000 новозаразени.
– Се наоѓаме во многу деликатна фаза на пандемијата, неопходно е да се одржи високо ниво на анти-ковид мерки. Она што најмногу нè загрижува е брзото ширење на бразилската, англиската и јужноафриканската мутација на вирусот. Ако масовната вакцинација не се спроведе брзо, новите мутации коронавирусот може да ја намалат ефикасноста на имунизацијата, рече Џани Реза, директор на одделот за превенција при Министерството за здравство.
Во Италија, од пет заразени, еден е инфициран со британската мутација на коронавирусот.
Последната анти-ковид мерка на Владата во оставка е продолжување на забраната за движење меѓу регионите до 25 февруари.
