Во четири месеци војна, Израелците упаднаа во неколку палестински болници, како што се катарската болница, болницата Камал Адван и специјализираната детска болница Ал-Рантиси, во потрага по оружје и милитанти. Сепак, болницата Ал-Шифа зазема посебно место во конфликтот бидејќи е најголемата болница во Газа и затоа што израелските лидери тврдат дека под неа се наоѓа команден центар на Хамас, а болничкиот персонал ги негира обвинувањата.

Доказите разгледани од „Њујорк Тајмс“ покажуваат дека Хамас складирал оружје во болницата и дека под неа имало тунел со пристап до вода, струја и вентилација. Тунелот е долг најмалку 200 метри и веројатно се поврзува со мрежата на тунелите на Хамас.

Израелските војници пронашле подземни бункери, станбени простории и соба со компјутери и опрема за комуникација. Израелците морале внимателно да се движат низ тунелот бидејќи бил полн со замки, па го уништиле бидејќи им снемало време за истражување. Тие морале да ја напуштат болницата бидејќи тоа бил еден од условите на примирјето во ноември.

Американските разузнавачи тврдат дека борците на Хамас се евакуирале неколку дена пред Израелците да ја пребараат болницата и дека ги уништиле документите и електрониката што војниците би можеле да ги најдат таму. Во болницата непосредно пред претресот што го извршиле Израелците, пет новороденчиња починале поради недостиг на струја и гориво.

Израел јавно објави докази кои, според нив, потврдуваат дека Хамас ги криел своите борци меѓу пациентите и таму држел заложници. Израелската армија соопшти дека пред претресот на Ал-Шифа го предупредиле болничкиот персонал, ги отвориле патиштата за евакуација и заедно со војниците испратиле медицински персонал.

Израел објави видео од безбедносните камери во болницата Ал-Шифа, на кое, наводно, се гледа како двајца заложници биле донесени во болница откако биле киднапирани на 7 октомври.

ополнителните докази што Израелците ги пронајдоа таму беа гранати и торба со предмети кои наводно им припаѓале на заложниците од Кибуц Беери. На паркингот на болницата е пронајдено и возило идентично на она што беше употребено во нападот на 7 октомври.

Израелската војска на својата веб-страница напиша дека под Ал-Шифа „лежи лавиринт од тунели кои лидерите на Хамас ги користат за спроведување терористички активности и каде што произведуваат различно оружје и муниција“. Израелците останале во болница нешто повеќе од една недела, по што со експлозив го уништиле тунелот.