Во Групата седум индустриски најразвиени земји, продолжува да расте нееднаквоста, се наведува во извештајот на меѓународната невладина организација Оксфам, чие објавување коинцидира со Самитот на лидерите на Г-7 викендов во Париз.

Извештајот е на тема нееднаковост во различни области како меѓугенерациската мобилност, намалување на даноците за богатите, занемарување на социјалата, привилегираност на акционерите, климатските промени и глобалното затоплување, нееднаквоста на жените, помош за сиромашите земји, прекумерните донации на компаниите за политички кампањи и преголемите трошоци за здравствена заштита во САД.
Според наодите на Оксфам, во Г-7 најсиромашните 20 отсто од населението примаат само пет проценти од вкупно заработените парични приходи, додека на најбогатите 20 отсто од вкупното население паѓаат 45 проценти од вкупните парични приходи.

– Нерамномерната распределба на богатството во земјите од Г-7 се зголемува уште од 80-тите години, се посочува во извештајот.

Се додава дека како резултат на застојот на економијата и намалување на платите во овие земји, во изминатите десет години се зголемил оној дел од работното население кое ризикува да стане сиромашно. Поединечно по земји, оваа ризична група во Германија е девет отсто од вкупно вработеното население, во Франција е повеќе од седум, во Италија е 12 и околу девет проценти во Велика Британија.

Ова e резултат на влијанието на супер богатите индивидуи и корпорации кои ја користат својата моќ да влијаат врз социјално-економската политика на национално и меѓународно ниво во своја полза, наведува Оксфам.

– Се занемаруваат вложувањата во социјалната сфера и се намалува финансирањето на социјалните служби. Покрај тоа, под изговор за мерки на штедење и консолидација на државните и буџетски долгови, се спроведуваат многубројни реформи и приватизации со негативен ефект, истакнуваат експертите на организацијата.

Во заклучокот на извештајот, Оксфам бара од лидерите на Г-7 да спроведат мерки за намалување на нерамноправноста како на пример минимален замрзнат данок за сиромашните групи.

– Новиот данок на претседателот на САД, Доналд Трамп, донесен во 2017 година е пример од учебниците за фаворизирање на гигантските корпорации и најбогатите граѓани на сметка на сиромашните и работничката класа, се истакнува во извештајот.

Покрај тоа, од Оксфам повикуваат земјите од Г-7 да започнат финансирање на многу поопфатни дејности на бесплатните социјални служби. Според организацијата „борбата против нееднаквоста треба да стане дел од постоечките развојни стратегии“.

Во извештајот на Оксфам се истакнува и дека повеќе од половина од светското богатство е во сопственост на луѓето кои живеат во земјте од Г-7; најбогатите 10 отсто од населението во земјите на Г-7 располага со околу половина или повеќе од богатството во тие земји; најсиромашните 50 проценти од населението во Г-7, располага со само 10 отсто од богатството; работничка во фабрика за ракчиња во Тајланд треба да работи 4.000 години да заработи просечна годишна плата на генерален директор на „Волмарт“ во САД.

Оскфам е меѓународен сојуз од 20 добротворни организации од повеќе од 90 земји кои се борат за искоренување на сиромаштијата во светот. Организацијата е основана 1942 година во Англија, а седиштето и е во Најроби, Кенија.