Американскиот претседател Доналд Трамп и канадскиот премиер Марк Карни веројатно ќе одржат разговори во наредните денови откако САД воведоа царини од 35 проценти за стоки што не се опфатени со трговскиот договор меѓу САД, Мексико и Канада, изјави денес висок канадски функционер.
Министерот за трговија на САД и Канада во федералната влада, Доминик Лебланк, за Си-Би-Ес њуз изјави дека е „охрабрен“ од неодамнешните разговори и верува дека договор за намалување на царините останува опција.
„Охрабрени сме од нашите разговори со американскиот секретар за трговија Хауард Лутник и американскиот трговски претставник Џејмисон Грир, но сè уште не сме во точката каде што треба да постигнеме договор што е во најдобар интерес на нашите економии“, рече Лебланк.
Тој додаде дека очекува Карни и Трамп да разговараат во наредните денови и дека Канада верува дека постои опција за намалување на дел од тарифите, што би обезбедило поголема сигурност во инвестициите, објави Ројтерс.
Објавувајќи ги тарифите за Канада во петокот, Вашингтон делумно го поврза потегот со неуспехот на земјата да го спречи шверцот со фентанил.
Воведувањето на овие тарифи е најновиот удар во тарифната војна што трае со месеци, а која американскиот претседател ја започна кратко по враќањето во Белата куќа.
Карни истакна дека Канада покрива само околу еден процент од увозот на фентанил во САД и дека интензивно работела на понатамошно намалување на обемот на шверцување на оваа дрога, потсети Ројтерс. На 1 август, Доналд Трамп потпиша извршна наредба со која се зголемуваат царините за канадските стоки од 25 на 35 проценти.
Овој потег, кој делумно е оправдан со неуспехот на Канада да го спречи шверцот со фентанил, се однесува на производи надвор од рамките на трговскиот договор меѓу САД, Мексико и Канада.
Премиерот Карни во тоа време изјави дека царините ќе ги погодат силно канадските индустрии како што се дрва, челик, алуминиум и автомобили.
Канадскиот премиер вети дека владата ќе преземе мерки за заштита на работните места, поддршка на канадското производство, инвестирање во индустриска конкурентност и диверзификација на извозните пазари.
