Канадскиот премиер Марк Карни денес изјави дека ќе се сретне со американскиот претседател Доналд Трамп во вторник во Вашингтон.
Карни, поранешниот гувернер на Банката на Канада, рече дека не сака да се преправа дека овие разговори ќе бидат лесни. Тој нагласи дека Канаѓаните избрале нова влада „која ќе му се спротивстави на Трамп и ќе изгради силна економија“, пренесува АП.
Карни и Трамп разговараа по телефон претходно оваа недела и се согласија наскоро да одржат средба лице в лице. Трамп минатата недела изјави дека „навистина не трола“ кога зборуваше за претворање на Канада во 51-ва американска држава.
Минатиот месец, Трамп воведе царини од 25 проценти за канадски производи и 10 проценти за енергетски производи, наведувајќи ја како причина „кризата“ предизвикана од дрогата и мигрантите што доаѓаат од Канада, што Сенатот неодамна успеа привремено да ја блокира.
За време на изборната кампања, Карни редовно ги нарекуваше американските постапки предавство и изјави дека ќе се залага за разговори за градење нови безбедносни и одбранбени врски.
