Недостапно на органите на прогонот е лицето кое вчера пукало и рани друго лице во угостителски објект во Кочани, а Основното јавно обвинителство од овој град соопшти дека го гони за обид за убиство.
-Надлежен јавен обвинител заедно со увидни екипи од Министерството за внатрешни работи синоќа го заврши увидот на местото на настанот во угостителски објект во Кочани, каде вчера околу 17:00 часот едно лице беше рането со огнено оружје. Прибрани се траги од местото на настанот кои ќе бидат предмет на вештачење. Издадени се наредби за прибирање податоци и земање исказ од очевидци, како и претрес на лица и објекти со цел утврдување на фактите во предметот, соопшти денеска Јавното обвинителство.
Поради постоење на основано сомнение, надлежен јавен обвинител донел наредба за спроведување на истрага против едно лице за сторен квалификуван (потежок) облик на кривичното дело убиство.
Настанот, како што е наведено во соопштението од Обвинителството, се случил откако меѓу повеќе лица кои претходно заедно седеле на маса, започнала вербална расправија. Потоа осомничениот извадил пиштол и испукал проектил во едно лице при што му нанел прострелна рана на сега оштетениот.
Во моментот на пукањето, во угостителскиот објект имало присутни и други лица, кои осомничениот ги довел во опасност што дава посебна тежина на кривичното дело кое го сторил. По пукањето, а поради сериозноста на повредата, оштетениот придружуван од едно лице – сведок на настанот, бил упатен во Скопје каде му е укажана медицинска помош. Сведокот потоа е вратен во Кочани, каде по барање на јавниот обвинител, а пред судија на претходна постапка дал исказ за настанот.
-По претходно преземена координирана акција, утринава уште три лица кои присуствувале на кривично правниот настан се лишени од слобода и со нив се превземаат дејствија во насока на расчистување на настанот. Во моментов сторителот е недостапен на органите на прогонот, се наведува во соопштението.
