Косовскиот премиер Албин Курти вчера беше домаќин на лидерите на коалицијата „Вреди“ во Македонија, Билал Касами, Арбен Таравари, Изет Меџити и Африм Гаши, на кои им го честитал изборниот резултат на 8 мај, велејќи дека тоа е првпат албанската опозиција да достигне над 100 илјади гласови, јави Коха.мк.
На средбата се разговарало за прашања од значење за Албанците во Македонија, но и за меѓудржавните односи, како и за други важни прашања.
-Загрижувачко за соговорнците е руското и српското влијание, кое се случува и преку коруптивни и криминални мрежи. Развојот на инфраструктурата што ги поврзува Косово и С. Македонија беше една од главните теми на разговор, заедно со идеи и проекти за заживување на економската, културната и образовната соработка, наведува весникот.
Средбата, според кабинетот на Курти, минала во духот на срдечната соработка, имајќи предвид дека „Албанците на Балканот се фактор за поддршка на демократизацијата, европските интеграции, евроатлантскиот мир, безбедноста и стабилноста“.
