Повеќе од 13 милиони Италијанци летово се откажале од одморите поради неизвесноста, стравот и финансиските тешкотии од пандемијата со Ковид-19, што е 23 отсто помалку туристи во однос на минатата година.
Во Италија повеќето луѓе кои и годинава се решија да одат на одмор избираат туристички дестинации во својата земја заради поддршка на домашниот туризам, но и заради неизвесноста околу патувањата во странство, покажа анализата на здруженијата Колдирети и Институт X.
Околу 25 отсто од Италијанците избрале дестинација во близина на нивниот дом, односно во рамките на регионот на живеење, а најчесто избрани локации им се крајбрежните градови, планини, помалите градови и села.
Поради пандемијата, италијанските туристи оваа сезона претпочитаат да останат во своите викендички, да посетуваат роднини и пријатели или да изнајмат станови и куќи, отколку да престојуваат во хотели.
