Триесет години С. Македонија работи на дигитализацијата, од првиот ден на нејзината независност. Ние сме предводници во регионот во сегментот на телекомуникациите и поврзувањето и сме прва земја што брзо ги замени аналогните со дигиталните системи. Кај нас моментно 83 отсто од домаќинставата имаат пристап до широкопојасен интернет, а 91 процент од компаниите користат различна технологија и широкопојасен инренет, рече премиерот Димитар Ковачевски на Талинскиот дигитален самит 2023 во Естонија.

Ковачевски, кој се обрати на отворањето на Самитот, потенцира дека пред 30 години земјава ја иницираше и ја изгради дигиталната Трансбалканската линија со операторите од Турција, Бугарија, Албанија и Италија, обезбедувајќи комукникациско поврзување Исток – Запад.

-Со тоа ја отворивме вратата за широка соработка на економиите. Но, не сопревме тука. Ја поддржавме решеноста да изградиме оптика за секој дом. Лидери сме и во воведувањето на 5Г технологијата на пазарот. Создадовме инфрастурктура за дигитално поврзување. Ги елиминиравме и трошоците за роаминг во регионот, правејќи чекор напред кон ЕУ, истакна премиерот.

Тој посочи и дека Македонија годинава ја воведе АДА, првиот асистент за вештачка интелигенција што им помага на компаниите при аплицирањето за владина поддршка.

-Само во првите 48 часа од воведувањето, АДА опслужи над 1 300 граѓани. Во процес сме на формирање агенција за дигитализација за брза и ефиаксна дигитална трансформација која ќе биде фокусирана на четирите столба: сајбер безбедност, ИТ инфраструктура, софтверски решенија и академски дел, подвлече Ковачевски.

На Самитот учествуваат лидери на држави, претставници на ЕУ, телекомуникациски и tech компании и граѓански организации. Клучните теми на кои ќе се разговара на Талински дигитален самит 2023 се предизвиците и можностите во дигиталната ера, како и освежување на агендата на демократијата и технологијата, исцртувајќи го патот кон посилна отпорна, респонзивна и отворена иднина. Целта на Самитот е суштински придонес кон глобалниот дискурс околу градењето на отпорни модерни демократии.

Во рамки на учеството на Самитот, предвидено е претседателот на Владата, Ковачевски да оствари билатерална средба со премиерката на Естонија, Каја Калас.