Либиската криза е резултат на директното мешање на Северноатлантската алијанса, што предизвика хаос во земјата, изјави рускиот министер за надворешни работи Сергеј Лавров, во интервју за египетскиот весник „Ахрам“.
– Долгогодишната криза во Либија е директна последица на нелегитимното воено мешање на НАТО. Како резултат на тоа, државата западна во хаос, стана извор на регионална нестабилност, расадник на тероризмот, рече Лавров.
Тој додаде дека Москва ги поддржува напорите на специјалниот претставник на генералниот секретар на ОН, Гасан Салама, за спроведување на планот за нормализација на состојбата, што подразбира одржување на започнатите избори и уставни реформи.
Конференцијата за национално помирување во Либија ќе се одржи од 14 до 16 април.
Лавров нагласи дека враќањето на државноста во земјата треба да помине низ дијалог и дека Русија и Египет ги координираат напорите за решавање на состојбата во Либија.
– Наша задача е да им помогнеме на Либијците да ги надминат постоечките несогласувања и да постигнат стабилен договор за параметрите на национално помирување, рече Лавров.
