Силното невреме кое попладнево ја зафати Скопската котлина, Тетовско и други региони во земајва, предизвика материјална штета, а повеќе пријави и известувања од граѓаните се добиени на Единствениот број за итни повици 112 во Центарот за управување со кризи (ЦУК).

– Добиени се пријави и известувања за: паднати и навалени дрвја, скршени гранки, скинати проводници, навалени бандери и други проблеми со електрични, интернет и телефонски кабли, поплавени куќи, поплавени подрумски простории и гаражи, поплавени улици, проблеми во снабдувањето со електрична енергија, оштетени покриви, скршени стакла и откачени лимови и олуци од куќи и згради, оштетени патнички моторни возила, паднати огради, блокирани улици и слични случаи предизвикани од невремето, се наведува во соопштението од ЦУК.

Невремето во Скопје направи огромни штети. Граѓаните на социјалните мрежи објавија за штетите, поплавените подруми и летнати делови од кровови.

„Волково има огромни штети од невремето кое штотуку заврши. Ветрот налета сигурно со над 100 км на час. Од град се обели се’. Кај нас се искрши дрво, ми летна сето прекрасно тропско цвеќе, прокиснаа таваните во три соби. Кај комшиите се летнати покриви, оџаци, поплавени подруми, искршени фотоволтаици, на улиците течат реки. Вакво нешто во животот не сум видела. Една минута пресилен ветер го однесе селото“, напиша на Фејсбук Соња Христовска Угриновска, жителка на оваа скопска населба.

Поплавени се куќи, а луѓето сами се ангажираат и црпат вода од куќа во куќа. Водата од улиците влегуваше во дворовите.

Од УХМР известуваат дека нестабилната облачна маса од која во западните и северните делови од Скопската котлина имаше појава на невреме, се преместува во правец кон Куманово каде исто така се очекуваат процеси во форма на невреме.

Од ЕВН Македонија информираат дека во моментот без електрична енергија се делови од Ѓорче Петров, Сарај, Кондово, Волково, Граничен премин Блаце и Новоселски Пат, Тетово – Џепчиште, Непроштено, Једоарце, Отуње, Сетоле, Сарачино, Желино, Гостивар – Дебреше, Врањовце, Зубовце, Врапчиште, Пожаране и Топлинци, Битола – Горно и Долно Агларци, Добромири, Далбеговци, Трап, Будаково, Мусинци, Алинци, Трничани, Мојно, Маково, Рапеш, Орле, Долно Орехово, Румази, Паралово, Мегленце и околината. Струја нема и во Радовиш – Богулево, Дамјан, Бучим, Коџалија, Парналија.

Тимовите, како што се наведува, веќе се ангажирани за непречено снабдување со електрична енергија во наведените реони.