Победата на Сузан Крафорд на изборите за Врховниот суд во Висконсин над конзервативниот кандидат поддржан од американскиот претседател Доналд Трамп и милијардерот Илон Маск го зацврсти либералното мнозинство на највисокиот суд во државата уште најмалку три години.
Победата на Крафорд им зададе катастрофален удар на републиканците, кои стравуваат дека исходот од изборите за Врховниот суд во Висконсин може да го отвори патот за пресуди кои ќе ја блокираат агендата на Републиканската партија во оваа клучна американска држава.
Трамп, Маск и другите републикански лидери стравуваат дека победата на Крафорд значи дека судот, контролиран од либералите со разлика од четири спрема три, ќе ги прекрои конгресните линии на Висконсин на начин што може да им помогне на демократите да освојат најмалку две места во Претставничкиот дом и да го вратат мнозинството.
Маск и групите што ги поддржува потрошија повеќе од 20 милиони долари за да му помогнат на конзервативниот кандидат Бред Шимел на изборите во Висконсин. „Мислам дека ова ќе биде важно за иднината на цивилизацијата. Тоа е исклучително значајно“, изјави Маск пред толпата поддржувачи во понеделникот.
Тој тогаш посочи дека Врховниот суд во Висконсин, меѓу другото, може да се занимава со редефинирање на границите на конгресните области, што на крајот може да влијае на тоа која партија го контролира Претставничкиот дом на САД.
