Љубљанскиот весник „Рдечи прапор“ на 21 август известува за Илинденското востание во Македонија. Написот ја истакнува главната цел на востанието и фанатично решителните востаници: независност и слобода за Македонија.
„Зарем не постои мирен начин да се издејствува независност и слобода за Македонија?“ – прашува авторот на написот.
„Очигледно револуцијата се шири во Македонија. Турција апсолутно не е во состојба да ја задуши. На втори овој месец востаниците прокламираа револуција и подвлекоа дека ќе употребат динамит во својата борба и дека ќе се држат до зборот. Во Европа очевидно се појавува прашањето: зарем не постои ни еден мирен начин за да се издејствува независност и слобода на Македонија?
…И понатаму ги гледаме маките на македонското население: во последните десет години се затворени над сто илјади Македонци. Турските војници се особено безмилосни. Селото Смрдеш го уништија со топови и го испотепаа сето население. Во селото Баница куќите се запалени со петролеј итн. Турците пак се жалат дека и Македонците се безмилосни. Секако на Балканот се готви голем пресврт.”
„Delavec Rdeči Prapor”, 21 август 1903 г, бр. 34 , стр. 2.
