Изградбата на железнички пруги значи изградба на историја, изјави денеска директорот на Јавното претпријатие за железничка инфраструктура „Железници на РСМ“, Хари Локвенец на прес-конференција по повод одбележувањето на 149 години од постоењето на македонски железници, одржана на мостот пред железничката станица во Неготино.
Локвенец потсети дека на 9 април, далечната 1873 година, првиот воз влечен од парна локомотива пристигнал во железничката станица во Велес и тогаш почнало поврзувањето на Македонија со остатокот од светот.
– Затоа, дозволете да им се заблагодарам и на сите ветерани и сегашни вработени и да им го честитам 9 април – Денот на македонските железничари. Со посветена работа и истрајност, ќе ги надминеме сите предизвици. Наредната година ќе го одбележиме нашиот голем 150 годишен јубилеј со реализација на значајни проекти, зошто ние не ветуваме напразно, туку и реализираме, додаде тој.
Локвенец се осврна и на приоритетите на македонски „Железници“.
– Наш приоритет број еден е изградбата на Коридорот 8 на источниот и западниот дел со што граѓаните и стопанството ќе имаат железнички пристап од Црното и Јадранското Море. Истото дополнително ја засилува оправданоста и придобивките на овој проект како за РС Македонија, така и за регионот во целина. За неколку недели го потпишуваме договорот со новиот изведувач, по што почнува градбата на железницата кон Бугарија, по чијашто реализација, двата народи и двете држави ќе имаат огромен број просперитетни можности за меѓусебна соработка. Со ова започнуваме со реализација и остварување на тридецениската желба и потреба на граѓаните, информираше директорот.
Тој рече дека оваа година Денот на железничарите го одбележуваат во работна атмосфера, потенцирајќи дека и денеска се испитува носивоста на железничките мостови со статичко и динамичко оптоварување и се прават најсовремени испитувања во соработка со професори од градежните факултети во Скопје и Љубљана, а со цел зголемување на сигурноста во железничкиот сообраќај.
– Мостот на кој се наоѓаме е пред железничката станица во Неготино. Токму затоа и оваа прес-конференција ја одржуваме на оваа локација, за да покажеме и докажеме дека безбедноста на нашите граѓани за нас е најважна. Овој наш празник го одбележуваме со јасно потврдениот интерес, за вредноста и перспективите на железничкиот сообраќај и за огромните придобивки кои лежат во потенцијалите на вкрстувањето на Коридорот 8 со Коридор 10, нагласи Локвенец.
Тој најави и дека наредната година ќе биде отворен Музеј на македонските железници.
– Ќе се отвори првиот Музеј на македонски железници, со цел достоинствено одбележување на Јубилејот 150-годишното постоење на македонски железници и основање на првиот историско-технички музеј во нашата држава, кој ќе функционира како составен дел на Јавното Претпријатие и вечно ќе сведочи за 150-годишната македонска железничарска историја, откри тој, честитајќи го празникот и како внук на железничар.
