Францускиот претседател Емануел Макрон денеска во Либревил, главниот град на Габон, изјави дека ерата на француското мешање во Африка е завршена и дека сега Франција е „неутрален соговорник“ на тој континент, отфрлајќи секакво мешање.
„Времето на „Франсафрик“ помина и понекогаш чувствувам дека менталитетите не се развиваат со иста брзина како ние, кога читам, слушам и гледам дека на Франција сè уште и се припишуваат намери што ги нема“, рече Макрон во обраќањето до француската заедница во Габон.
Терминот „Франсафрик“ се однесува на постколонијалната стратегија на Франција за поддршка на авторитарните лидери да ги бранат своите интереси.
„Се чини дека сè уште се очекува Франција да заземе позиции што таа одбива да ги заземе и јас целосно го поддржувам тоа. Во Габон, како и насекаде, Франција е неутрален соговорник кој зборува со целиот свет и чија улога е да не се меша во внатрешната политика“, рече Макрон.
Во последните денови опозицијата во Габон го обвини францускиот претседател дека го поддржува претседателот Али Бонго со доаѓањето во Либревил во изборна година.
Францускиот претседател во понеделникот во Париз рече дека Франција ќе го реорганизира своето воено присуство на африканскиот континент и повика на нови партнери, далеку од нетранспарентни врски и поддршка за сегашните лидери.
Макрон учествува на еколошки самит во Габон, првата од четирите африкански земји што ќе ги посети.
На самитот Макрон рече дека сака да изгради балансирано партнерство и да се заложи за заеднички проекти со африканските земји за климата, биодиверзитетот, економските и индустриските прашања на 21 век.
Макрон пристигна вчера во Либревил, а потоа ќе оди во Република Конго, позната и како Конго-Бразавил и Демократска Република Конго.
