Францускиот претседател Емануел Макрон изјави дека денешниот напад со нож во градот Мулхаус во источна Франција без сомнение е „исламистички чин на тероризам“.
Макрон рече дека министерот за внатрешни работи Бруно Ретајо, кој излегол на местото на настанот, ќе ги соопшти деталите за случајот во текот на вечерта, пишува „Фигаро“.
„Сакам да испратам порака за решеноста на владата и својата да ја продолжиме работата што ја работиме осум години за да направиме се што можеме за да го искорениме тероризмот на нашата почва“, рече Макрон на маргините на посетата на Парискиот земјоделски саем.
Најмалку едно лице загина, а неколку други се повредени во напад со нож во источниот француски град Мулхаус во неделата попладне, при што напаѓачот извикувал „Алаху Акбар“ за време на нападот, пренесоа француските медиуми. „Фигаро“ пренесува дека нападот се случил на маргините на протестот за поддршка на Конго.
