Поранешниот руски претседател Дмитриј Медведев се потсмеваше на посетата на четворицата европски лидери на Киев, нарекувајќи ги бескорисни во твит, во кој се исмејуваше со националните стереотипи.
„Европските љубители на жаби, колбаси и шпагети сакаат да го посетуваат Киев“, напиша тој на англиски, алудирајќи на францускиот претседател Емануел Макрон, германскиот канцелар Олаф Шолц и италијанскиот премиер Марио Драги.
Медведев беше претседател на Русија од 2008 до 2012 година, а моментално е заменик-претседател на Советот за национална безбедност. Од почетокот на руската инвазија тој на својот Твитер профил често ги исмева изјавите на европските политичари.
Посетата на лидерите „нема никаква корист“, напиша тој. „Тие ѝ ветија членство во ЕУ и стари хаубици на Украина, зашеметени од горилка (украинска вотка) и патуваа со воз, како пред 100 години“.
„Да, тоа нема да ја приближи Украина до мир. Часовникот отчукува“, напиша тој.
