Новинарка е убиена денеска во мексиканскиот град Папанта, земја која е најопасна за извршување на таа професија.
Марија Елена Ферал, дописник на дневниот весник „Диарио де Ксалапа“, влегувала во својот автомобил кога двајца непознати мажи на мотор отвориле оган врз неа, а потоа побегнале од местото на настанот, изјави полициски извор.
– И покрај напорите на лекарите да го спасат нејзиниот живот, длабоко жалиме, кога дознавме дека пред неколку минути новинарката Марија Елена Ферал починала, напиша на Твитер гувернерот на државата Веракруз, Куитлауак Гарсија.
Мексико е една од најопасните земји во светот за новинарите, со над 100 убиени од 2000 година досега.
– Властите треба итно да спроведат истрага за овие настани и да обезбедат заштита за нејзиното семејство и колеги, истакна Балтина Флорес од меѓународната организација „Репортери без граници“.
