Италијанската премиерка Џорџа Мелони денеска изјави дека тарифите на ЕУ кои денеска ги објави американскиот претседател Доналд Трамп се грешка, но дека, како што наведе таа, не се катастрофални.
Мелони изјави за италијанската државна телевизија РАИ дека влијанието на американските тарифи не треба да се прецени и дека одговорот на нив треба внимателно да се разгледа, пренесе Ројтерс.
„Не смееме да алармираме, тоа не е катастрофа“, рече Мелони, истакнувајќи дека не е убедена дека најдобриот начин да се одговори на американските закани е воведувањето реципрочни царини.
Американската администрација објави дека основната тарифа од 10 отсто за целиот увоз во САД ќе стапи на сила на 5 април, проследено со реципрочни царини за приближно 60 земји и територии кои Белата куќа ги нарече „најлоши престапници“ на 9 април.
Одредени земји и територии ќе се соочат со царина од само 10 проценти, а меѓу нив се Сингапур, Бразил, Австралија, Нов Зеланд, Турција, Колумбија, Аргентина, Ел Салвадор, Обединетите Арапски Емирати и Саудиска Арабија, јавува Би-Би-Си.
