Наша проценка од тоа што го анализираме во мерењата е дека неопределените се многу повеќе од 100 илјади гласа. Нашите детални анализи велат дека од четири гласа кај неопределените сигурно два доколку излезат би гласале за ВМРО-ДПМНЕ, а останатите два би делеле другите опозициски условно кажано политички партии вклучително и оние кои се во условно кажано албанскиот блок, рече Христијан Мицкоски, претседател на ВМРО-ДПМНЕ на вечерашното гостување на телевизија 21 во емисијата Клик плус.

Мицкоски додаде дека ќе се стави акцент да се убедат неопределените да излезат на избори и да гласаат.

„Убеден сум дека од сите оние условно кажано неопределени гласови најмалку половината доколку одлучат да излезат да гласаат, а ние ќе сториме се бидејќи тоа ќе ни биде главната кампања, нормално користејќи ги демократските методи да ги убедиме дека е потребно да се излезе и да се гласа“, рече Мицкоски.

Мицкоски кажа дека седењето дома на овие избори е поддршка за ДУИ и СДС и токму поради тоа важно е масовно да се излезе на гласање.

„Граѓаните мора да знаат дека седењето дома и на тој начин искажување револт, или негласањето е во суштина гласање. Само во тој случај гласате за Артан Груби, Али Ахмети, Зечевиќ, Маричиќ и останатите. Затоа е многу важно да имаме масовна мобилизација која ќе се случи и луѓето ќе излезат да гласаат на изборите“, заклучи Мицкоски.

Што се однесува до денешната пријава против Оливер Спасовски, тој истакна дека таа е шанса з ановиот јавен обвинител да покаже дека Македонја законите важат еднакво за сите:

Очекувам дека Оливер Спасовски ќе сноси одговорност за тоа што го има направено како надлежен ресорен министер во МВР, дали тоа ќе биде како резултат на оваа кривична пријава сега или на некоја кривична пријава или кривични пријави набрзо од денес, тоа ќе видиме. Немам голема доверба во октроираното обвинителство и судство, но да видиме, вели Христијан Мицкоски претседател на ВМРО-ДПМНЕ во вечерашното гостување во емисијата Клик Плус на ТВ 21.

На прашањето дека денеска е избран нов јавен обвинител, Мицкоски истакна дека тој е изгласан од сегашното владејачко мнозинство, но преку поднесената кривичната пријава за Оливер Спасовски треба новиот јавен обвинител да покаже дали ќе продолжи да биде слеп послушник на политиките на раководството на СДСМ и ДУИ, или ќе се одважи.

Па нов обвинител кое што старото мнозинство си го избра. Од тоа што можам да видам гледам дека бил прилично лојален изминатиот период на ова старо мнозинство кое ќе биде за неколку месеци. Но, ајде да дадеме шанса па да видиме дали ќе продолжи трендот на неговиот претходник да биде безгласна буква и слеп послушник на политиките на раководството на СДСМ и ДУИ, или ќе се одважи. И еве му шанса сега преку ова кривична пријава за Оливер Спасовски да покаже дека во Македонија можат да владеат законите и дека може да се врати вербата и довербата во институциите, истакна Мицкоски.

Мицкоски додаде дека ВМРО-ДПМНЕ нема вина за хаосот со патните документи, бидејќи и покрај активната блокада од страна на пратеничката група на ВМРО-ДПМНЕ, владејачкото мнозинство поминале многу закони со злоупотреба на европското знаменце, при што доколку сакале ќе ги изгласаа и измените во законите за лични документи.

Не би се сложил дека активната блокада е пречка доколку некој сакаше тоа да го направи, бидејќи тие поминаа многу закони во парламентот на брза трака со злоупотреба на европското знаменце. Така што доколку сакаа или пак ако некој мислеше и имаше стратешка цел тоа да се случи тоа и ќе го направеа. Но, тие за жал тоа не го направија. Не поради тоа што покажуваа пркос, туку едноставно затоа што беа зафатени со пљачкање и разграбување на државата. И нормално фокусот беше ВМРО-ДПМНЕ и јас изминатите години, наместо да си ја работат работата за тоа за кое што се платени и надлежни. Така што доколку таму постоеше искрена желба кај овие европејци, тогаш наместо да се однесуваат како мафијаши во крими филмовите, тие можеа да си ја завршат работата за која што се платени, смета тој.

Претседателот Мицкоски го повика мнозинството на власта да го поддржат и изгласаат законот кој го предложи пратеничката група на ВМРО-ДПМНЕ за продолжена важност за пасошите.

Доколку постои желба и во актуелното мнозинство сега во парламентот сега ќе се случи и ќе се надмине овој проблем, односно ќе се поддржи законот кој што го предложи пратеничката група на ВМРО-ДПМНЕ со кој што законот кои што ги третира патните документи, односно пасошите ќе биде продолжено времетраењето на важноста на истите, укажа Мицкоски.

Мицкоски потсети на изјавите на тогашниот портпарол на владата на СДСМ и ДУИ, Миле Бошњаковски кој на прес конференција рекол дека нема да има вонредна процедура за вадење на лични документи односно како ќе истекува рокот на важење на старите документи така тие ќе се обновуваат, но како што рече тој брутално ги излажал граѓаните.

И ако се вратите наназад во времето, кога оној капитулантски договор го потпишуваше оваа влада и ги слушнете изјавите на тогашниот портпарол на влада Бошњаковски, а сега прв соработник на Стево Пендаровски ќе ви стане јасно дека тој ја убедува јавноста дека практично нема да има вонредна процедура за вадење на лични документи, а со цел промена на истите, поради условите кои што се содржани во тој капитулантски договор кој што оваа влада го потпиша. Тој тогаш вели дека како ќе истекува рокот на важење на старите документи така тие ќе се обновуваат. Значи брутално лажење. Замислете тоа доаѓа од устата на тогашниот портпарол на владата. Тоа значи дека кога портпарол кажува став тој го кажува ставот на целата влада, нагласи Мицкоски и додаде дека реалноста денеска е дека потребни се најмалку две години за сите пасоши кои до овој момент се во сопственост на македонските граѓани да бидат променети.

И каква е денеска реалноста? Денеска реалноста е дека ние физички и математички во овој момент во идеални услови без да има дефект во работењето на уредите кои ги печатат пасошите ви се потребни најмалку година и пол до две години за да сите пасоши кои до овој момент се во сопственост на македонските граѓани, бидат издадени.

На прашањето што ќе направат со патните исправи, Мицкоски рече:

Многу едноставно. Има закон во парламентот, ако сега не се изгласа, следното мнозинство ќе поднесе ист таков закон со кој што ќе се продолжи важноста на патните документи односно пасошите.