Министерката за правда Рената Дескоска денеска ја потпиша „Конвенцијата на Обединетите нации за Меѓународни договори за спогодување, што произлегуваат од медијацијата“, позната како Сингапурската конвенција за медијација.
Како што соопшти Министерството за правда, со потпишувањето на оваа конвенција, нашата држава испрати сигнал до странските инвеститори дека ги прифаќаме меѓународните инструменти со кои гарантираме сигурност на странските инвестиции.
Церемонијата за потпишување за Сингапурската Конвенција се одвиваше во организација на Министерството за правда на Сингапур и Комисијата на Обединетите нации за меѓународно трговско право (UNCITRAL).
Конвенцијата беше усвоена со консензус во Генералното собрание на ООН на 20 декември 2018 година. Тоа ќе биде првиот договор на ООН што ќе го носи името по Сингапур. Листата на потписници говори за значајноста на оваа конвенција: САД, Кина, Јапонија, Турција, Индија, Австралија, Иран, Катар и други, посочуваат од Министерството за правда.
